Одбележан Светскиот ден на науката

Факултетот за информатички и комуникациски технологии-ФИКТ кој работи во состав на Универзитетот „Св. Климент Охридски“ и Македонско научно друштво-Битола, со академски час го одбележаа Светскиот ден на науката. На промотивниот настан, деканот на ФИКТ, проф. д-р Игор Неделковски посочи дека организаторите на академскиот час се едни од ретките кои го одбележуваат Светскиот ден на науката, која како што рече сеуште е на маргините на општеството.

-А, науката, рече Неделковски е битен елемент за развојот на секое општество и затоа не смее да се заборава на Светскиот ден на науката. Очекуваме наскоро ФИКТ, инфраструктурно да биде водечка сила на научниот развој во регионот, посебно од сферата на информатичките науки бидејќи дел од новиот објект има современи лабаратории кои најдоцна до нова година да бидат промовирани. Станува збор за корисна површина од околу 2.000 квадратни метри со најсовремени лабаратории кои ќе бидат на располагање на студентите, посочи Неделковски и додаде дека науката треба да се сака бидејќи таа може значително да го промени животот на секој човек.

На академскиот час во овој град, МНД-Битола ја претстави сопствената издавачка дејност, меѓународната размена на книги и списанија што ја остварува со академиите во регионот, односно САНУ-Белград, ХАЗУ-Загреб и АНУБИХ-Сараево, како и соработката со МАНУ која трае повеќе од половина век.

-Годинава, светскиот ден на науката се одбележува под мотото „Науката – човеково право“, и ако е право за секој човек, тогаш треба посветено да се работи бидејќи науката генерира енергија. Потребно е да се подобри третманот на науката бидејќи создава нови знаења, потребно е да се почитуваат истражувањата и добиените резултати за да се применат во пракса. Потребно и институциите да донесуваат одлуки врз основа на квалитетни научни информации базирани на најновите научни сознанија затоа што само така ќе се намали степенот на  импровизации или донесување погрешни одлуки, истакна универзитетскиот професор и новинар Марјан Танушевски, претседател на МНД-Битола.

sl-01 sl02
sl04 sl03